आफ्नै प्रशासनिक भवन बनाउन असफल पोखरा महानगर

पुरानो भवन रहेको ठाउँमा बहुतले भवन बनाउने योजना बुनिरहेको महानगरले आफैं पनि धेरै ठाउँमा व्यापारिक भवन बनाएर भाडा खाइरहेको छ । तर आफैं भने प्रशासनिक भवनविहीन छ । १८ कात्तिक, पोखरा । पोखरा महानगरपालिकाका तत्कालीन मेयर मानबहादुर जीसीको कार्यकाल सकिनुभन्दा दुई दिनअघि राष्ट्र बैंक चोकस्थित गल्फ कोर्सको ४२ रोपनी जग्गा ३५ वर्षका लागि ठेक्कामा दिइयो ।

उक्त जग्गा जीसीका ज्वाइँ विष्णु भण्डारीको कम्पनीले लिएको थियो । १८ रोपनी जग्गामा भने जीसी र शिला शालिग्राम निर्माण सेवा प्रालिबीच सम्झौता भएको थियो । पृथ्वीचोकस्थित यातायात व्यवस्था कार्यालयले यसअघि सवारी ट्रायल सेन्टरको रूपमा प्रयोग गरेको करिब ५ रोपनी जग्गाको ठेक्का राइजिङ प्रालिले पाएको थियो । मेयर जीसी बिरामी परेपछि ज्वाइँ राम भण्डारीका सहोदर भाइ विष्णुलगायतले जग्गा हात पार्दा धेरैतिरबाट आलोचना भयो ।

नागरिकस्तरबाटै विरोध भएपछि भर्खर निर्वाचित भएर आएका पोखराका मेयर धनराज आचार्यले छानबिन समिति बनाए । समितिको प्रतिवेदनका आधारमा मेयर आचार्यले ठेक्का सम्झौता तोड्दै घोषणा गरे, ‘पोखरा ७ र १७ मा पर्ने राष्ट्र बैंकको जग्गामा प्रशासनिक भवन बन्छ । ’ मेयर आचार्यभन्दा अगाडि जीसीले पनि आफ्नै कार्यकालमा महानगरको प्रशासनिक भवन बनाउने घोषणा गरेका थिए ।