सुदूरपश्चिमविरुद्ध जितका लागि काठमाडौंले पायो १२६ रनको लक्ष्य

कप्तान दीपेन्द्र सिंह ऐरीको अर्धशतक सहयोगमा सुदूरपश्चिम रोयल्सले नेपाल प्रिमियर लिग (एनपीएल) मा काठमाडौ गोखार्जसामु जितका लागि १ सय २६ रनको लक्ष्य प्रस्तुत गरेको छ। कीर्तिपुरस्थित त्रिवि क्रिकेट मैदानमा काठमाडौले टस जितेर फिल्डिङ रोजेपछि ब्याटिङ गरेको सुदूरपश्चिमले निर्धारित २० ओभरमा ६ विकेटको क्षतिमा १ सय २५ रनको योगफल तयार पारेको हो।

२.३ ओभरमा नै ८ रन बनाउँदा ४ विकेट गुमाएर दबाबमा आएको सुदूरपश्चिमका लागि आरिफ शेख र दिपेन्द्र सिंह ऐरिले पाचौँ विकेटका लागि ६२ रनको साझेदारी गर्दै इनिङ्स सम्हाले। आरिफ १६ न बनाउँदा रन आउट भए।

छैटौ विकेटका लागि कप्तान दीपेन्द्र र थरिन्दु रत्नायकेले ५४ रनको साझेदारी गरेपछि सुदूरपश्चिमले सम्मानजनक योगफल तयार पारेको थियो। ५५ बलमा ५ चौका र २ छक्का सहयोगमा ६० रन बनाएका दीपेन्द्र जहानदाद खानको बलमा भिम सार्कीको हातबाट क्याच आउट भए।