कास्कीको सिक्लेसमा पर्यटकको घुइँचो, ६ दिनमा पुगे ३ हजार जनाभन्दा बढी

पोखरा। पर्यटकीय याम सुरु भएसँगै कास्कीको पर्यटकीय गाउँ सिक्लेसमा पर्यटक आगमन उल्लेख्य रूपमा बढेको छ। पछिल्लो ६ दिनमा तीन हजारभन्दा बढी पर्यटकले सिक्लेसको भ्रमण गरेका छन्। मादी गाउँपालिका-१ का वडाध्यक्ष देविजंग गुरुङका अनुसार कात्तिक १५-२० गतेसम्म ३ हजार १४६ जना पर्यटक सिक्लेस पुगेका छन्। यस आधारमा सिक्लेसमा दैनिक औसत ५२४ जना पर्यटक भित्रिएका उनले बताए।

गाउँ पुगेका पर्यटकमध्ये अधिकांशले सिक्लेसको बसाइपछि प्रख्यात पर्यटकीय गन्तव्य कोरी तथा हिमनदी तालक्हफुचेतर्फ पदयात्रा तय गर्ने वडाध्यक्ष गुरुङले जानकारी दिए। ६ दिनको पर्यटक आवागमनको विवरणअनुसार सबैभन्दा बढी पर्यटक कात्तिक १८ गते सिक्लेस पुगेका छन्। सो दिन एकैपटक ७१९ जना पर्यटक गाउँ पुगेका थिए भने सबैभन्दा कम कात्तिक १५ गते २५४ जना यहाँ पुगेका वडाध्यक्ष गुरुङले जानकारी दिए। पर्यटकको यस्तो उत्साहजनक आगमनले स्थानीय होटल तथा घरबास (होमस्टे) व्यवसायीमा नयाँ उत्साह थपेको उनले बताए। कास्कीको सदरमुकाम पोखराबाट करिब ३८ किमिको दूरीमा पर्यटकीय गाउँ सिक्लेस अवस्थित छ।

यस गाउँमा करिब ४०० घरधुरी छन्। यहाँ गुरुङ समुदायको बाहुल्यता छ। रासस The post कास्कीको सिक्लेसमा पर्यटकको घुइँचो, ६ दिनमा पुगे ३ हजार जनाभन्दा बढी appeared first on BIZMANDU .