आईजीपी हटाउन ‘अर्जेन्ट’ बोलाइएको थियो मन्त्रिपरिषद्को बैठक

प्रधानमन्त्री वालेन्द्र शाहले बुधबार दिउँसो पौने १ बजे मन्त्रिपरिषद् बैठक राखेको सन्देशसहितको सूचना मन्त्रीहरूलाई एसएमएसमार्फत जानकारी गराइयो। यसअघिका मन्त्रिपरिषद् बैठक बस्नुअघि कार्यसूचीसहित केही घण्टाको समय राखेर बैठकको सूचना दिने गरेको थियो। तर, बुधबार त्यसो गरिएन। केही कार्यसूची नै नदिएर एक्कासी बैठक बोलाइएको एक मन्त्रीले जानकारी दिए।

'आजको बैठक एकदम आकस्मिक रुपमा बोलाइएको हो, एक बज्न लागेको बेला एक बजेदेखि मन्त्रिपरिषद् बस्ने भनेर नोटिस आएको हो,' ती मन्त्रीले नेपालखबरसँग भने, 'केही कार्यसूची पनि पठाइएको थिएन। ' यो बैठक यसकारण पनि आकस्मिक हो कि मंगलबार मात्र एक घण्टा बैठक बसेको थियो र ४३ वटा कार्यसूचीमाथि छलफल गरेर निर्णय गरेको थियो। तर, आजै फेरि बैठक बस्न लागेको कुराले मन्त्रीहरू नै अन्योलमा परेका थिए। बैठक सुरु भएपछि बल्ल तीन वटा कार्यसूचीबारे जानकारी दिइएको अर्का मन्त्रीले बताए।

मन्त्रिपरिषद् बैठक १५ मिनेट पनि नबसेको उनको भनाइ छ। शिक्षामन्त्री समेत रहेका सरकारका प्रवक्ता सस्मित पोखरेलले बैठकले तीन वटा निर्णय गरेको जानकारी दिए।