रिलिजअघि नै बक्स अफिसमा सुनामी ल्याउँदै ‘रामायण’, एड्भान्स बुकिङबाट १०० करोड नजिक

रणवीर कपुर अभिनीत फिल्म ‘रामायण: पार्ट वन’ प्रदर्शनमा आउन अब एक दिन मात्र बाँकी छ । नोभेम्बर ५ मा विश्वभरका सिनेमाघरमा प्रदर्शन हुन लागेको यस फिल्मले रिलिजअघि नै भारतीय बक्स अफिसमा ठूलो हलचल मच्चाएको छ । फिल्मले भारतमा पहिलो पाँच दिनको एड्भान्स बुकिङबाट ९६.५६ करोड भारु ग्रस कलेक्सन गरेको छ । यससँगै फिल्म १०० करोड भारुको आँकडाको निकै नजिक पुगेको छ । यद्यपि, यसमा सिनेमाघरले दर्शकका लागि ब्लक गरेका सिटको मूल्य पनि समावेश छ ।

ती सिटको रकम हटाउँदा एड्भान्स बुकिङबाट भएको कमाइ ७७.३१ करोड भारु हुन्छ । ट्रेड वेबसाइट स्याकनिल्कका अनुसार, नोभेम्बर ४ बिहान ७ बजेसम्म फिल्मका पहिलो पाँच दिनका लागि ८३ हजार ३२ शो उपलब्ध थिए । ती शोका लागि २५ लाख ६५ हजार टिकट बुकिङ भएको थियो । सिनेमाघरले ब्लक गरेका सिट हटाउँदा बुकिङ भएका टिकटको संख्या २० लाख ५७ हजार हुन्छ । फिल्मको एड्भान्स बुकिङमा प्रदर्शनको पहिलो दिन अर्थात् नोभेम्बर ५ सबैभन्दा अगाडि छ ।

पहिलो दिनका लागि ३९.३५ करोड भारुको ग्रस एड्भान्स बुकिङ भएको छ । ब्लक गरिएका सिटको रकम हटाउँदा यो आँकडा ३३.३४ करोड भारु हुन्छ । दोस्रो दिन अर्थात् शुक्रबारका लागि १८.५३ करोड भारु, शनिबारका लागि १९.६८ करोड भारु र आइतबारका लागि १३.२३ करोड भारुको एड्भान्स बुकिङ भएको छ । सोमबारका लागि भने अहिलेसम्म ५.७८ करोड भारुको बुकिङ भएको छ ।