नेपाली राजदूतावास पोर्चुगलको आधिकारिक सूचनामा नेपाल संवत् उल्लेख, सरोकारवालाद्वारा स्वागत

लिस्बन (पोर्चुगल) । पोर्चुगलस्थित नेपाली राजदूतावास, लिस्बनले आफ्नो आधिकारिक सूचना पत्रमा विक्रम संवत् र इस्वी संवत्सँगै राष्ट्रिय संवत् 'नेपाल संवत्' पनि उल्लेख गर्न सुरु गरेको छ । राजदूतावासद्वारा मिति २०८३/०७/२७ (नोभेम्बर १३, २०२६) मा जारी गरिएको आधिकारिक सूचना पत्रमा 'ने.सं.

११४७ कछलाथ्व चतुर्थी' उल्लेख गरिएको हो। यसअघि एक कार्यक्रममा अभियन्ता गंगाबहादुर नेम्कुलले नेपाल संवत् र विक्रम संवत्को ऐतिहासिक पृष्ठभूमि, महत्त्व तथा नेपालको राष्ट्रिय पहिचानसँग जोडिएको नेपाल संवत्को गौरवपूर्ण इतिहासबारे प्रकाश पारेका थिए। सोही अवसरमा नेम्कुलले नेपाल संवत्लाई राष्ट्रिय पहिचान र ऐतिहासिक सम्पदाका रूपमा सम्मान गर्दै विदेशस्थित नेपाली दूतावासहरूको आधिकारिक पत्राचार, सूचना तथा प्रशासनिक कामकाजमा समेत यसको प्रयोगलाई प्राथमिकता दिनुपर्ने माग राखेका थिए ।

साथै, उनले नेपालको शैक्षिक पाठ्यक्रममा नेपाल संवत्को ऐतिहासिक महत्त्व र प्रयोगसम्बन्धी विषय समावेश गर्नुपर्ने मागसहितको अनुरोधपत्र प्रमुख अतिथि राजदूत प्रकाशमणि पौडेलसमक्ष हस्तान्तरण गरेका थिए । आफ्नो मागलाई सम्बोधन गर्दै राजदूतावासले आधिकारिक सूचनामा नेपाल संवत्लाई स्थान दिएकोमा नेम्कुलले नेपाली राजदूतावास लिस्बनप्रति हार्दिक धन्यवाद व्यक्त गरेका छन् ।