भारतको कश्मीरमा चरमपन्थी हमलामा तीन सुरक्षाकर्मी घाइते

एक अधिकारीका अनुसार दिउँसो कुलगामको मीर बजार क्षेत्रस्थित नौपोरा अखराननजिक मोटरसाइकलमा आएका अज्ञात आक्रमणकारीले प्रहरी टोलीमाथि गोली चलाएका थिए । भारतको दक्षिण कश्मीरस्थित कुलगाम जिल्लामा बुधबार संदिग्ध चरमपन्थीले गोली चलाउँदा केन्द्रीय रिजर्भ प्रहरी बल (सीआरपीएफ) का कम्तीमा तीन जवान घाइते भएका छन् । सीआरपीएफका एक अधिकारीका अनुसार दिउँसो कुलगामको मीर बजार क्षेत्रस्थित नौपोरा अखराननजिक मोटरसाइकलमा आएका अज्ञात आक्रमणकारीले प्रहरी टोलीमाथि गोली चलाएका थिए । गोली चलेको आवाज सुनेपछि स्थानीय पसलेहरूले पसल बन्द गरेका थिए भने सडकमा हिँडिरहेका सर्वसाधारण ज्यान जोगाउन भागेका थिए ।

आक्रमणपछि हमलाकर्ता घटनास्थलबाट फरार भएका छन् । घाइते जवानहरूलाई अनन्तनागस्थित सरकारी मेडिकल कलेजमा भर्ना गरिएको थियो । अस्पतालका मेडिकल सुपरिटेन्डेन्ट डा. बिलाल मुशर्रफ बन्देका अनुसार एक जवानको पेटमा, अर्काको हातमा र तेस्रोको खुट्टामा चोट लागेको छ ।

उनले तीनै जनाको अवस्था स्थिर रहेको जानकारी दिए। तर, अधिकारीहरूको अनुरोधमा एक जवानलाई थप उपचारका लागि श्रीनगरस्थित सैनिक आधार अस्पताल पठाइएको छ । प्रत्यक्षदर्शीका अनुसार दक्षिण कश्मीरका कुलगाम र अनन्तनाग जिल्लाका विभिन्न स्थानमा सुरक्षा जाँच चौकी स्थापना गरी आवतजावत गर्ने व्यक्तिहरूको तलासी भइरहेको छ ।