विराटनगर किङ्स ‘गर या मर’ को अवस्थामा

विराटनगर। नेपाल प्रिमियर लिग (एनपीएल) २०२६ को लिग चरण अब निर्णायक तथा अन्तिम मोडमा आइपुगेको छ । कुल २८ लिग खेलमध्ये २५ खेल सकिँदा शीर्ष चारको समीकरण निकै रोचक बनेको छ । हालसम्म सुदूरपश्चिम रोयल्स (१० अङ्क) र लुम्बिनी लायन्स (९ अङ्क) ले शीर्ष चारमा आफ्नो स्थान लगभग पक्का गरिसकेका छन् भने जनकपुर बोल्ट्स (४ अङ्क), कर्णाली याक्स (अधिकतम ६ अङ्क) र पोखरा एभेन्जर्स (अधिकतम ४ अङ्क) उपाधि दौडबाट बाहिरिसकेका छन् ।

यस्तोमा प्लेअफको बाँकी दुई स्थानका लागि तेस्रो स्थानको काठमाडौँ गोर्खाज (८ अङ्क), चौथो स्थानको चितवन राइनोज (७ अङ्क) र पाँचौँ स्थानको विराटनगर किङ्स (६ अङ्क) बीच कडा त्रिकोणात्मक प्रतिस्पर्धा देखिएको छ । अङ्कतालिकाको पाँचौँ स्थानमा रहेको विराटनगर किङ्सका लागि शीर्ष चारको यात्रा सहज नभए पनि असम्भव भने छैन । अब बाँकी रहेका लिगका अन्तिम ३ खेलको नतिजाले विराटनगरको भाग्य फैसला गर्नेछ । विराटनगरले हालसम्म खेलेका ६ खेलमा ३ जित र ३ हारसहित ६ अङ्क जोडेको छ ।

उसको नेट रनरेट –०.५२४ रहेको छ । लिग चरणमा अब तीन खेल मात्र बाँकी छन् । जसमध्ये शनिबार दिउँसो ४ः३० बजे विराटनगर किङ्स विरुद्ध लुम्बिनी लायन्स, आइतबार दिउँसो १२ः३० बजे चितवन राइनोज विरुद्ध कर्णाली याक्स र सोही दिन ४ः३० बजे काठमाडौँ गोर्खाज विरुद्ध पोखरा एभेन्जर्सबीच खेल हुनेछ ।