साविक विजेता लुम्बिनी प्लेअफमा, कर्णालीलाई कठिन

बिहीबार भएका दुई खेलबाट एनपीएलको प्लेअफ पुग्ने लुम्बिनी पहिलो टोली बन्यो। त्यस्तै, प्लेअफ दौडबाट बाहिरिने पोखरा एभेन्जर्स पहिलो टोली बन्यो। चार खेलमा जित, एक खेलमा हार र एक खेलमा अंक बाँडेको लुम्बिनी नौ अंकसहित तालिकाको शीर्षस्थानमा उक्लिएको छ। लुम्बिनी काठमाडौसँग मात्र पराजित भएको छ भने चितवन राइनोजसँगको खेल वर्षाले प्रभावित हुँदा अंक बाँडेको थियो। लिग चरणको अन्तिम खेलमा लुम्बिनीले शनिबार विराटनगर किंग्ससँग प्रतिस्पर्धा गर्नेछ।

लुम्बिनी विराटनगरसँगको खेलमा जित निकाल्दै तालिकाको शीर्ष दुईमा रहेर सिधै पहिलो क्वालिफायर खेल्न योजनामा हुनेछ। लुम्बिनीसँगको हारले कर्णालीको प्लेअफ यात्रा कठिन बनेको छ। सुरुवाती दुई खेलमा जित निकालेको कर्णालीले पछिल्लो चार खेलमा लगातार हार बेहोरेको छ। लिग चरणको तेस्रो खेलमा काठमाडौ गोर्खाजसँग चार विकेटले पराजित भएपछि कर्णाली खेलमा फर्कन सकेको छैन। दुई खेलमा जित र चार खेलमा हार भोगेको कर्णाली चार अंकसहित तालिकाको सातौँ स्थानमा छ।

कर्णालीले लिग चरणको अन्तिम दिनको पहिलो खेलमा चितवन राइनोजसँग खेल्नेछ। कर्णालीले अब चितवनविरुद्ध जित निकालेर मात्र पुग्नेछैन। प्लेअफ यात्रा तय गर्न अन्य खेलको नतिजा समेत आफु अनुकुल आउनुपर्नेछ। बिहीबार कर्णालीले दिएको १०६ रनको झिनो लक्ष्य लुम्बनीले १६.४ ओभरमा ६ विकेटको क्षतिमा भेट्टायो।