के तपाईं आफ्नो जीवनसाथीप्रति पूर्ण निष्ठावान् हुनुहुन्छ ?

हिमाली जिल्लाको कठ्याङ्ग्रिने जाडो र निस्तब्ध भूगोलमा कार्यरत रहँदा एक दिन महिला सहकर्मीले अचानक सोधिन्— ‘के तपाईं आफ्नो दाम्पत्य जीवनको यात्रामा मन, वचन र कर्मले पत्नीबाहेक अरू कसैलाई हृदयमा स्थान नदिई पूर्ण निष्ठावान् हुनुहुन्छ ?’ हिमाली जिल्लाका दूरदराजका बस्तीहरूमा व्यावसायिक कामको सिलसिलामा हामी तैनाथ थियौँ। ठूलै टिम सो प्राविधिक कार्यका लागि क्रियाशील थियो, जसमा एक जना महिला सहकर्मी पनि हुनुहुन्थ्यो। योजनामुताबिक हामी खटिएको जिल्लाका सबै स्थानीय तहमा पुग्नुपर्ने थियो।

तर, यो पटकको एक स्थानीय तहको यात्रामा अन्य सदस्यहरू जिल्लाकै काममा व्यस्त हुने भएकाले सहभागी हुन नसक्ने भए। फलस्वरूप, त्यो यात्रामा हामी दुई जना- ती महिला सहकर्मी र म मात्र यात्रा गर्ने भयौँ। हुन त हिमाली जिल्लामा प्रायः सधैँ नै चिसो हुन्छ, तर त्यो पुस–माघको महिना भएकाले हिउँदको कठ्याङ्ग्रिने जाडो थियो।

तत्कालीन गाउँपालिका सदरमुकाममा बसाइ व्यवस्थापन गरेर हामी वरिपरिका संरचनाहरूको अन–साइट प्राविधिक सहजीकरण र अनुगमनका लागि निस्कने गर्थ्यौँ। हिमाली त्यो कठोर, विशाल र निस्तब्ध भूगोलमा काम गर्दा मानिस आफ्नो सामाजिक आवरणभन्दा धेरै पर पुगेर नितान्त प्राकृतिक र आन्तरिक बन्दो रहेछ।