परिवारका ६ सदस्य गुमाए, शोकले बिरामी परे अवधेश, डेढ वर्षीय छोरा पनि घाइते

हेटौंडा : मकवानपुरको भीमफेदी गाउँपालिका–६ चिसापानीगढीमा बिहीबार भएको दुर्घटनामा परिवारका ६ जना सदस्य गुमाएका सर्लाहीका अवधेश यादव आफैं बिरामी परेका छन्। घटनापछि विक्षिप्त उनको ब्लड प्रेसर घटेर स्वास्थ्यमा समस्या आएको छ। उनको अहिले हेटौंडा अस्पतालको आकस्मिक कक्षमा राखेर उपचार भइरहेको छ। दुर्घटनामा उनले ३५ वर्षीया गर्भवती श्रीमती पुनमदेवी यादव, १० वर्षीया जेठी छोरी अनुकुमारी यादव, ७ वर्षीया माइली छोरी दीक्षा यादव, ५ वर्षीया कान्छी छोरी दीपिका यादव, २६ वर्षीय सहोदर भाइ विकेश यादव र २४ वर्षीय सहोदर भाइ सुबोध यादवलाई गुमाए।

दुर्घटनामा घाइते भएका अवधेशका डेढ वर्षका छोरा सुदीपको काठमाडौंमा उपचार भइरहेको छ। उनीहरू छठ मनाउन सर्लाहीको चक्रघट्टा गाउँपालिका–४ सुन्दरपुर टोलस्थित घर फर्कंदै थिए। घटनामा १४ जनाको मृत्यु भएको छ भने ६ जना घाइते भएका छन्। अवधेश भने गाडीमा सिट नपाएपछि परिवारसँग आएका थिएनन्।

आफू अर्को दिन आउने भन्दै सबैलाई गाडी चढाएर उनी डेरामा फर्किएका थिए। तर, बिहान सबेरै दुर्घटनाको खबरपछि उनी हेटौंडा आइपुगेका थिए। आफूले घर पठाएकामध्ये एक जनामात्र जीवित रहेको खबर पाएयता उनी विक्षिप्त छन्।