बैंकको बचत अपचलन आरोपमा पाराग्वेका राष्ट्रपति पदमुक्त, घरमै नजरबन्दमा

२१ कात्तिक, काठमाडौं । दक्षिण अमेरिकी देश पाराग्वेका राष्ट्रपति सान्टियागो पेनालाई महाअभियोगमार्फत पदबाट हटाइएको छ । बैंकिङ संकटसँग जोडिएको आर्थिक अनियमितताको आरोपमा पदमुक्त भएको केही मिनेटमै उनलाई प्रहरीले पक्राउ गरी घरमै नजरबन्दमा राखेको बीबीसीले जनाएको छ । शुक्रबार संसद्को माथिल्लो सदन सिनेटमा भएको मतदानमा आफ्नै दलका सांसदसमेतले साथ दिएपछि पेना पदमुक्त भएका हुन् । उनीमाथि पदको दुरुपयोग र अनियमिततामा संलग्न भएको आरोप लगाइएको छ ।

पेनाले बिहीबार नै राष्ट्रपतिबाट राजीनामा दिने घोषणा गरेका थिए । तर संसद्ले उनको राजीनामा स्वीकार गर्नुको सट्टा महाअभियोग प्रक्रिया अघि बढाएर पदबाट हटाउने निर्णय गरेको थियो । यससँगै उनले पूर्वराष्ट्रपतिका रूपमा पाउने आजीवन सिनेट सदस्यको हैसियत र कानुनी उन्मुक्तिसमेत गुमाएका छन् । पेना गत वर्षसम्म बैंकको स्वामित्व रहेको कम्पनीमा सेयरधनी थिए । तर उनले आफू कुनै पनि गलत कार्यमा संलग्न नभएको दाबी गर्दै आएका छन् ।

पाराग्वेको केन्द्रीय बैंकले डिजिटल बैंक युएनोलाई आफ्नो नियन्त्रणमा लिएपछि उत्पन्न आर्थिक संकटले राजनीतिक रूपसमेत लिएको हो । बैंकको कारोबार बन्द भएपछि करिब ३० लाख ग्राहक आफ्नो बचत तथा बैंकिङ सेवाबाट वञ्चित भएका छन् । यो संख्या पाराग्वेको कुल जनसंख्याको झन्डै आधा हो । बैंकमा सर्वसाधारणको बचतसँगै पेन्सन तथा सरकारी निकायको ठूलो रकमसमेत जम्मा रहेको थियो ।