प्रहरीमा भावी नेतृत्व जोडिएको एआईजी बढुवामा रस्साकस्सी

इन्स्पेक्टरको ११२औं ब्याचका खत्री, भट्टराई, अधिकारी, खनाल एआईजी बढुवा भएको अवस्थामा २०८४ चैत १७ पछि हुने आईजीपीको एउटा खाकासमेत देखिन्छ । हालका आईजीपी डा.केसी अहिलेकै अवस्थामा ३० वर्षे सेवा अवधिका कारण १७ चैत २०८४ मा अनिवार्य अवकाशमा जानेछन् । २६ कात्तिक, काठमाडौं । नेपाल प्रहरीका प्रमुख तथा आईजीपी दानबहादुर कार्कीलाई सरकारले प्रधानमन्त्रीको विशेष सुरक्षा सल्लाहकारमा सरुवा गर्‍यो । १८ कात्तिकको आकस्मिक मन्त्रिपरिषद् बैठकले सुरक्षा सल्लाहकारको दरबन्दी सिर्जना गर्दै कार्कीलाई सरुवा मात्रै गरेन, एआईजी डा.

मनोजकुमार केसीलाई ३४औं आईजीपी बनाउने निर्णय पनि सँगै गर्‍यो । अच्युतकृष्ण खरेल प्रकरणको ३० वर्षपछि प्रहरीमा फेरि त्यस्तै घटना दोहोर्‍याउँदै सरकारले हुँदै नभएको व्यवस्था सिर्जना गर्दै आईजीपीकै सरुवा गर्‍यो । यसलाई ३० वर्षपछि प्रहरीमा देखिएको राजनीतिक हस्तक्षेपको रूपमा सुरक्षा जानकारहरूले लिएका छन् । कार्कीको सरुवा गर्दै एआईजी केसीलाई आईजीपी बनाएसँगै नेपाल प्रहरीमा एक एआईजीको पद रिक्त भएको छ । अपराध अनुसन्धान विभागमा कार्यरत रहेका केसी आईजीपी बनेसँगै अहिले विभागको प्रमुख डीआईजी ओम राना छन् ।

अर्थात्, एआईजी प्रमुख हुने विभाग डीआईजीको भरमा चलेको छ । नेपाल प्रहरीमा अहिले एक एआईजी पद रिक्त भएको छ । त्यस्तै, अबको महिना दिनपछि ५ पुसमा थप ५ एआईजी प्रहरीमा खाली हुँदैछन् ।