अघि बढ्यो विज्ञान, प्रविधि तथा नवप्रवर्तन ऐनको मस्यौदा

नेपाल विज्ञान, प्रविधि तथा नवप्रवर्तन प्रज्ञा–प्रतिष्ठान (नास्ट) लगायतका निकायहरूको सञ्चालन र नियमनका साथै राष्ट्रिय विधि विज्ञान प्रयोगशालाको निर्माण तथा सञ्चालन गर्ने विषय पनि समेटिएको छ । २६ कात्तिक, काठमाडौं । विज्ञान, प्रविधि तथा नवप्रवर्तन ऐनको मस्यौदा अघि बढेको छ । वर्तमान सरकारले विज्ञान, प्रविधि र आविष्कारको क्षेत्रलाई संस्थागत र प्रभावकारी बनाउन भनेर विज्ञान, प्रविधि तथा नवप्रवर्तन मन्त्रालय स्थापना गरेको हो ।

तर यसका लागि छुट्टै ऐन छैन । ३० वैशाख २०८३ मा स्थपना भएको यो मन्त्रालयको नेतृत्व २६ जेठ २०८३ देखि डा. महावीर पुनले गर्दै आएका छन् । तर यसका लागि छुट्टै ऐन नहुँदा समस्या भएको भनेर सरकारले यसअघि विज्ञान, प्रविधि तथा नवप्रवर्तन अध्यादेश ल्याएको थियो ।

उक्त अध्यादेश ३० असोज २०८३ मा राष्ट्रपति रामचन्द्र पौडेलले जारी गरेका थिए । अध्यादेशले साविकको नेपाल विज्ञान तथा प्रविधि प्रज्ञा–प्रतिष्ठानलाई पुनर्संरचना गर्दै नेपाल विज्ञान, प्रविधि तथा नवप्रवर्तन प्रज्ञा–प्रतिष्ठानको रूपमा स्थापित गर्ने र अनुसन्धान तथा नवप्रवर्तनलाई संस्थागत गर्ने बाटो खोलेको छ । मुलुकको विज्ञान, प्रविधि र नवप्रवर्तन क्षेत्रको अध्ययन, अनुसन्धान तथा प्रवद्र्धन गर्न एक स्वायत्त र प्रभावकारी प्राज्ञिक संस्थाको रूपमा काम गर्ने उद्देश्य राखिएको छ ।