बजेट कार्यान्वयनमा झनै दयनीय प्रदेश सरकार

खासगरी पूँजीगत खर्चले गति लिन नसक्दा पहिलो त्रैमासिक अवधिमा संघ सरकारको खर्च दयनीय छ । संघ सरकारको यस्तै प्रवृत्तिबाट पाठ सिक्न नसकेका प्रदेश सरकारले आफ्नो प्रगति अझ दयनीय रहेको पुष्टि गरेका छन् । २४ कात्तिक, काठमाडौं । संघीय सरकारले चालु आर्थिक वर्ष २०८३/८४ पहिलो त्रैमासिक अवधिमा लक्ष्यको १८.८४ प्रतिशत बजेट खर्च गर्न सक्यो । खासगरी पूँजीगत खर्चले गति लिन नसक्दा पहिलो त्रैमासिक अवधिमा संघ सरकारको खर्च दयनीय छ ।

संघ सरकारको यस्तै प्रवृत्तिबाट पाठ सिक्न नसकेका प्रदेश सरकारले आफ्नो प्रगति अझ दयनीय रहेको पुष्टि गरेका छन् । कमजोर बजेट कार्यान्वयन केन्द्र सरकारको पुरानै प्रवृत्ति हो । यसबाट पाठ सिक्दै अगाडि बढ्नुपर्नेमा प्रदेश सरकार अझ कमजोर अवस्थामा पुगेको त्रैमासिक तथ्यांकबाट देखिन्छ । ७ प्रदेश सरकारमध्ये ६ (सुदूरपश्चिम बाहेक) ले तोकिएको समयमै बजेट पास गरी १ साउनदेखि कार्यान्वयन थालेका थिए । यसमध्ये मधेस प्रदेश सरकारले आफ्नो त्रैमासिक प्रगति विवरण अझै सार्वजनिक गरेको छैन ।

उता, सुदूरपश्चिम प्रदेशमा भने तीन महिनासम्म राजनीतिक खिचातानीका कारण बजेट होलिडे कायम रह्यो । पहिलो त्रैमासिक सकिने अवस्था अर्थात् असोज अन्तिम सातामात्र सुदूरपश्चिम प्रदेशको बजेट पारित भएको हो । यस प्रदेशमा तत्कालीन मुख्यमन्त्री कमलबहादुर शाह नेतृत्वको सरकारले १ असारमा बजेट ल्याएको थियो । लगत्तै सत्ता गठबन्धन बदलियो ।