पटका पड्काएपछि दिल्लीमा वायु प्रदूषण खतरनाक स्तरमा

दीपावलीपछि सोमबार बिहान दिल्लीको वायु गुणस्तर खतरनाक अवस्थामा पुगेको छ । आइतबार राति मानिसहरूले ठूलो मात्रामा पटका पड्काएपछि सोमबार बिहान दिल्लीका विभिन्न क्षेत्रमा हुस्सु र धुवाँका कारण दृश्यता (भिजिबिलिटी) समेत निकै कम भएको थियो । केन्द्रीय प्रदूषण नियन्त्रण बोर्ड (सीपीसीबी) का अनुसार दिल्लीको पटपडगञ्जमा वायु गुणस्तर सूचकांक ९एक्यूआई० ४१८, आईटीओमा ४०६, राजीव चोकमा ३८१ र साउथ एक्सटेन्सन आसपासको क्षेत्रमा ३६० पुगेको थियो । उत्तर प्रदेशका नोएडा, गाजियाबाद, कानपुर र वाराणसीसहित १० सहरको वायु गुणस्तर सोमबार खतरनाक अवस्थामा पुगेको थियो । बिहान ७ बजे प्रयागराज, गोरखपुर र लखनउको एक्यूआई ५०० नाघेको थियो ।

उत्तर प्रदेशमा चिसो र हुस्सुको प्रभाव पनि देखिन थालेको छ । १५ भन्दा बढी सहरमा बाक्लो हुस्सु लागेको थियो । रातिको तापक्रम १५ डिग्री सेल्सियसभन्दा तल झरेको छ । मध्यप्रदेशमा पनि चिसो बढिरहेको छ । आइतबार राति भोपाल, इन्दौरसहित १४ सहरको तापक्रम १४ डिग्री सेल्सियसभन्दा कम थियो ।

राजस्थानका सहरमा आइतबार दिनको तापक्रम सामान्यभन्दा बढी थियो । बाडमेरमा अधिकतम तापक्रम ३८ डिग्री सेल्सियसभन्दा माथि पुगेको थियो । पछिल्लो १० वर्षमा यहाँ तापक्रम ३८ डिग्रीभन्दा माथि पुगेको यो दोस्रो पटक हो । दीपावलीमा गरिएको आतसबाजीका कारण मध्यप्रदेशमा पनि वायु प्रदूषण खतरनाक अवस्थामा पुगेको छ ।