एक महिनामा सेयर मूल्य उच्च दरले बढेका यी १० कम्पनी

२२ कात्तिक, काठमाडौं । तिहारअघि सेयर बजार परिसूचक नेप्से २६५५ अंकमा बन्द भयो । विगत एक महिनामा बजार परिसूचक नेप्से २.९८ प्रतिशत बढ्यो । समग्रमा नेप्से थोरै बढे पनि कुनै कम्पनीको सेयर मूल्य एक महिनामै १५.९४ प्रतिशतसम्म बढेको छ । विगत एक महिनामा मूल्य धेरै बढ्नेमा ८ वटा हाइड्रोपावर समूहका कम्पनी मात्रै छन् ।

एउटा माइक्रोलाइफ इन्स्योरेन्स र एउटा मात्रै वाणिज्य बैंक परेको छ । खासगरी जलविद्युत् कम्पनीहरूको पहिलो त्रैमासिक वित्तीय विवरण राम्रो आउने अपेक्षा लगानीकर्ताको छ । कात्तिक मसान्तभित्र यी कम्पनीले आफ्नो पहिलो त्रैमासिक वित्तीय विवरण सार्वजनिक गर्दछन् । बैंकहरूको ब्याजदर घटिरहेको र न्यून विन्दुमा आएका कारण जलविद्युत् कम्पनीहरूको ब्याज (वित्तीय) खर्च कम हुन गई नाफामा सिधा प्रभाव पार्नेछ । यहीं कारण आयोजनाको निर्माण सम्पन्न भई व्यवसायिक आम्दानी गरिरहेका जलविद्युत् कम्पनीको मूल्यमा प्रभाव देखिएको छ ।

विगत एक महिनामा मूल्य धेरै बढेका १० कम्पनीको वृद्धिदर ११.७३ प्रतिशतदेखि १५.९४ प्रतिशतसम्म रह्यो । घलेम्दी हाइड्रोपावरको मूल्य सबैभन्दा धेरै १५.९४ प्रतिशत बढेको छ । सबैभन्दा न्यून चुक्ता पूँजी रहेको जलविद्युत् कम्पनी कुथेली बुखरी स्मल हाइड्रोपावरको मूल्य एक महिनामा ११.७३ प्रतिशत बढेको छ ।