डोल्पा अस्पतालमा छैन आईसीयू सेवा, उपचार अभावमा छटपटाउँदै बिरामी

डोल्पा अस्पतालमा आईसीयू र भेन्टिलेटर सेवा छैन । अस्पतालमा ब्लड बैंकसमेत छैन । गम्भीर बिरामीलाई रगत आवश्यक पर्दा स्थानीयस्तरमै रक्तदाताको सहयोग लिनुपर्ने अवस्था छ । २२ कात्तिक, काठमाडौं । डोल्पा जिल्ला अस्पतालको बेड नम्बर ६ मा ६९ वर्षीय नरबहादुर बुढा छटपटाइरहेका छन् । लामो–लामो श्वास तानिरहेका बुढाको मुटुको चाल असामान्य गतिमा चलिरहेको छ । नाकमा अक्सिजनको पाइप जोडिएको छ ।

शरीर शिथिल भएको छ । बेडको छेउमा उनकी श्रीमती उभिइरहेकी छन्, श्रीमान्‌लाई सञ्चो हुने आशामा । नरबहादुरको अवस्था असामान्य छ । उनलाई तत्काल सघन उपचार कक्ष (आईसीयू) मा राखेर उपचार गर्नुपर्ने चिकित्सकहरू बताउँछन् । तर, उनी भर्ना भएको डोल्पा जिल्ला अस्पतालमा आईसीयू सेवा नै छैन । काइके गाउँपालिकाका नरबहादुरलाई केही दिनअघि दिसासँगै रगत देखिएको थियो । त्यसपछि शरीरका विभिन्न भाग सुन्निन थाले ।

स्वास्थ्य अवस्था थप बिग्रिँदै गएपछि परिवारले उनलाई अस्पताल पुर्‍याउने निर्णय गर्‍यो । उपचारमा संलग्न चिकित्सकका अनुसार नरबहादुरको शरीरमा रगतको मात्रा निकै कम छ । प्रारम्भिक परीक्षणमा मिर्गौला र कलेजोमा समेत समस्या देखिएको छ । ‘उहाँलाई आईसीयूमा राखेर उपचार गर्नु पर्नेछ । तर यहाँ सेवा छैन,’ अस्पताल प्रमुख डा. राजकुमार भुजेल भन्छन्, ‘हारगुहार गरेर रगत जोहो गर्दै सकेको उपचार गरिरहेका छौँ ।